വിജയം അകലെയല്ല
ഗോപകുമാര്‍ നെടിയത്ത്
വിജയിക്കാന്‍ ആഗ്രഹിക്കാത്തവരായി ഈ ഭൂമുഖത്ത് ആരാണുള്ളത്?. ആരും കാണുകയില്ല എന്ന ഉത്തരവുമായി നമുക്ക് മുന്നോട്ടു പോകാം.ലോക മലയാളികള്‍ക്ക് മുന്നില്‍ വിജയത്തിന്‍റെ വഴികള്‍ ഞാന്‍ സമര്‍പ്പിക്കുന്നു.ജീവിതവിജയം നേടാന്‍ ആഗ്രഹിക്കുന്നവര്‍ മാത്രം എന്‍റെ പാഠങ്ങള്‍ വായിക്കുക.ഇത് ഒരു തവണ വായിച്ചതുകൊണ്ടുമാത്രം ലക്ഷ്യത്തില്‍ എത്തിച്ചേരാന്‍ കഴിഞ്ഞെന്നു വരില്ല.ആത്മവിശ്വാസക്കുറവു തോന്നുമ്പോള്‍ വീണ്ടും വീണ്ടും വായിക്കുക. വിജയകരമായി കാര്യങ്ങള്‍ ചെയ്തുകൂടേ എന്ന് ചോദിച്ചാല്‍ പ്രവര്‍ത്തന മൂലധനമോ അടിസ്ഥാന മൂലധനമോ ഇല്ലാത്തതുകൊണ്ടാണ് ഒന്നും ചെയ്യാന്‍ കഴിയാത്തതെന്നും അതുണ്ടായിരുന്നെങ്കില്‍ എല്ലാം നേരെ ചൊവ്വെ ചെയ്യാന്‍ കഴിഞ്ഞേനെ എന്നും ചിലര്‍ പറയും.വിജയിക്കാന്‍ അടിസ്ഥാന മൂലധനം ആവശ്യമുണ്ടോ?വിഭവങ്ങളില്ലാതെ ആര്‍ക്കും വിജയിക്കാന്‍ കഴിയുകയില്ല.നിങ്ങള്‍ ശൂന്യതയില്‍ നിന്നുകൊണ്ടാണ് വിജയിക്കാന്‍ ആഗ്രഹിക്കുന്നതെന്ന് കരുതുക.വിജയത്തിന്‍റെ തേരിലേറി മുന്നോട്ടു പോകുവാന്‍ നമ്മുടെ മുന്നില്‍ വഴി വിശാലമായി തുറന്നു കിടപ്പുണ്ട്.അത് ആരും അടച്ചിട്ടില്ല.വിജയിക്കാന്‍ ആഗ്രഹിക്കുന്നവര്‍ക്ക് ഒരു ദിനചര്യ ആവശ്യമാണ്‌.അതിരാവിലെ,അതായത് സൂര്യോദയത്തിനു മുമ്പ് ഉണരുക.കുളി ഉള്‍പ്പെടെയുള്ള പ്രഭാതകര്‍മ്മങ്ങള്‍ നിര്‍വഹിച്ച ശേഷം കുറച്ചുനേരം ഒരിടത്ത് സ്വസ്ഥമായിരുന്നു വിശ്വസിക്കുന്ന ദൈവത്തിനെ ഓര്‍ക്കുക.മനസിലുള്ളത് മൗനമായി ദൈവത്തോട് പങ്കുവയ്ക്കുക.ഇപ്പോള്‍ മനസ്സ് ഒരു കണ്ണാടി പോലെ സുതാര്യമായിട്ടുണ്ടാവും.കളങ്കമില്ലാത്ത മനസ്സുമായി ഭാവിയെക്കുറിച്ച് ചിന്തിക്കുക.ആരായിത്തീരണം എന്തായിത്തീരണം എന്ന് നിങ്ങള്‍ ആഗ്രഹിക്കുന്നുവോ അത് ഭാവനയില്‍ കാണാന്‍ ശ്രമിക്കുക.ഈ സങ്കല്പം സകല നേരവും മനസ്സില്‍ ഉണ്ടാവണം.അടുത്തപടി അദ്ധ്വാനിക്കുക എന്നതാണ്.അദ്ധ്വാനമില്ലാതെ ഒരിക്കലും സമ്പത്ത് ഉണ്ടാവുകയില്ല.നിങ്ങള്‍ക്ക് ചെയ്യാന്‍ കഴിയുന്നത്‌ മാത്രം ചെയ്യുക.അത്യാഗ്രഹം കൊണ്ട് തന്നെക്കൊണ്ട് ഒരിക്കലും ചെയ്യാന്‍ കഴിയാത്ത കാര്യങ്ങള്‍ ചെയ്യാന്‍ ശ്രമിക്കരുത്.അത് പരാജയത്തിനു വഴി തുറക്കും.അദ്ധ്വനിക്കുന്നതിനു ആര്‍ക്കും തടസ്സമില്ല.അത് ബുദ്ധികൊണ്ടുള്ളതാവാം അതല്ലെങ്കില്‍ കായികപരമാവാം.കിട്ടുന്നതിന്‍റെ പകുതി ചിലവഴിക്കുക,ബാക്കി സമ്പാദിക്കുക.പണ്ട് വീട്ടമ്മമാര്‍ ചോറിനു അരി അളക്കുമ്പോള്‍ ഒരുപിടി മാറ്റി ഒരു പാത്രത്തില്‍ ഇട്ടുവക്കും.ഇത് ക്ഷാമകാലത്ത് സുഭിക്ഷമായി കഴിക്കാനുള്ള വകയായി മാറും.അതുപോലെ നിങ്ങള്‍ മിച്ചം പിടിക്കുന്ന ചെറിയ സംഖ്യകളും ഒരിക്കല്‍ ഒരു വലിയ തുകയാവും.ഇത് അടിസ്ഥാന മൂലധനമാക്കി നമുക്ക് സമ്പന്നതയുടെ കൊടുമുടിയില്‍ എത്തിച്ചേരാന്‍ കഴിയും.ചിന്തിച്ചിരുന്നു നേരം പാഴാക്കുന്നവര്‍ ഇന്നുമുതല്‍ ഒന്ന് ശ്രമിച്ച് നോക്കുക.നഷ്ടപ്പെടാന്‍ നമുക്കൊന്നുമില്ല.നേടാന്‍ ആണെങ്കില്‍ ഏറെയുണ്ടുതാനും .ശ്രമിക്കുക.നിങ്ങള്‍ വിജയിക്കും.
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ